Личната одговорност не треба да се врзува со одговорноста на целата институција. Случајот „Рекет“ само го збрза реализирањето на идејата да се интегрираат СЈО и Јавното обвинителство, нагласи министерката за правда, Рената Дескоска во интервју за ТВ Телма.
Во него, таа истакна дека идејата за интеграција на двете институции била ставена на маса од Министерството во преговорите со опозицијата за новиот закон за ЈО што очекува да биде прифатен од ВМРО-ДПМНЕ затоа што одделението за организиран криминал покажало дека може да се справи со случите на висока корупција.
„Навистина се непријатни случувањата на кои сведочевме во минатата недела. Да не речам дека се шокантни, генерално за сите кои очекувавме, верувавме и баравме ефикасни механизми за борба против корупцијата. Но, мислам дека личната одговорност не треба да ја врзуваме со одговорноста на целата институција. Овие настани што се случија даваат верба од една страна дека институцијата, што претходно, пак, не функционираше, а тоа е одделението за организиран криминал, сега одеднаш имате капацитетност, волја и спремност на тие луѓе внатре да излезат и да покренат кривични постапки, вели во интервју за ТВ Телма, министерката Дескоска.
Според неа, тоа дава надеж дека дури и постојните институции можат да одговараaт на предизвиците ако извршната власт не се меша и не врши притисок.
„Мислам дека тоа е охрабрувачки сигнал. Така што и тоа е еден од мотивите што сакаме реално да го зајакнеме ова обвинителство за организиран криминал со можности и финансиски и кадровски, бидејќи гледаме дека има потенцијал кој што навистина дава резултати“, заклучи министерката за правда, Дескоска.
Во однос на предметите, Дескоска појаснува дека сите случаи кои се водат во едното и во другото обвинителство сега ќе бидат случаи што ќе ги води новото ЈО.