На денешен ден, пред деветнаесет години, беше потпишан Рамковниот договор со кој се стави крај на неколкумесечниот конфликт во Македонија во 2001 година.
Преговорите почнаа во Скопје, а потоа продолжија во Охрид и резултираа со парафирање на документот на 13 август во претседателската резиденција на Водно во Скопје. Потпис на Рамковниот договор ставија тогашниот претседател на државата, Борис Трајковски, поранешниот претседател на ВМРО-ДПМНЕ и премиер Љубчо Георгиевски, претседателот на ПДП, Имер Имери и тогашните претседатели на СДСМ, Бранко Црвенковски и на ДПА, Арбен Џафери.
Свои потписи на договорот ставија и специјалните претставници на ЕУ, Франсоа Леотар и на САД, Џејмс Пердју.
Повеќе од 130 закони, законски измени и дополнувања се донесени во изминатите години од имплeментацијата на Охридскиот рамковен договор од кои најголем дел – 59 се закони за недискриминација и правична застапеност, 40 во сферата на идентитет, на култура, на образование и на децентрализација на власта.
За успешна имплементација на договорот беше формиран и Секретаријат за спроведување на Охридскиот рамковен договор, како дел од Владата.