Денеска во 11 часот треба да продолжи деветтото продолжение на собраниската конститутивна седница на која треба да се изберат членовите на Комисијата за избори и именувања и претседател на Собранието.
Како што вчера најавија од СДСМ нивните пратеници повеќе нема да се јавуваат за реплики, туку само ќе ја следат работата на претседавачот со седницата Трајко Вељаноски.
Пратеникот од СДСМ Александар Кирацовски рече дека клучот за разрешување на ваквата состојба во Собранието е Трајко Вељаноски.
„Ако работеше деловнички, зборот на 90 отсто од пратениците ќе им беше одземен, точката ќе беше завршена, ќе изберевме претседател, па дури и нова влада на Македонија“, рече Кирацоски, додавајќи дека тие се откажуваат од ова деловничко право.
Тој го потсети Вељаноски на два члена од Деловникот, 89 и 90, според кои треба да ги прекине говорниците доколку тие не се држат до говорот на пратеникот кој земал збор.
Вељаноски рече дека немал право да го ускратува правото на говор на пратениците и наведе дека за реплика на говорот на пратеникот Крсто Мукоски се пријавиле 70 пратеници.
„А за станување од столчето ќе почекате малку, таа желба не ја исполнувам“, рече Вељаноски.
На ова одговори и пратеникот Антонио Милошоски, кој рече дека Вељаноски работи по Деловникот и кога СДСМ има право да бара процедурални забелешки, тогаш истото право го имаат и пратениците од ВМРО-ДПМНЕ. Милошоски рече дека ситуацијата во државата и во Собранието е сензитивна, па од таа причина ги предупреди своите колеги да не планира да прави проблеми.
„Сите знаете дека ситуацијата е сензитивна, чувствителна е и тука во самото собрание и на улица и кај граѓаните. Нека не ве лаже паметот да правите некои чекори кои ќе ги зголемат тензиите. Не предизвикувајте инциденти, бидејќи никој за тоа нема мандат. Бидете сигурни и стабилни за да ја водиме оваа расправа. Не помислувајте на инциденти, бидејќи на никој не му треба тоа“, се закани Милошоски од говорницата.
Најголем дел од пратениците од СДСМ и коалицијата ја напуштија седницата поради како што рекоа узурпирањето на Собранието од страна на пратениците од ВМРО-ДПМНЕ.
По собраниската седница, средба одржаа лидерите на СДСМ и ДУИ со цел да најдат начин да ја деблокираат работата на Собранието.