-Верувам дека граѓаните ќе знаат да ценат и да оценат што е суштински, историски моментум за да решат за својата иднина, а не да останат заробеници на минатото, вели претседателот на Собранието Талат Џафери во интервју за 1тв.
Смета дека критиките дека е „диво“ избран и „диво“ ќе ја спроведе процедурата по секоја цена, се резултат на противењето на референдумот и спротивни на интересот на граѓаните и на државата. Според него, граѓаните, државата и институциите се пред историско искушение, дали ќе тргнат кон перспективна и просперитетна иднина во НАТО и ЕУ каква што веќе почувствувале луѓето од дијаспората.
-Нашите граѓани, институции и држава немаат причина да бидат дел од некое минато и да останат во вакуум во којшто нема јасна перспектива што ќе се случи ако решиме да останеме во статус кво, ако ги имаме пред вид сите глобални, геостратешки и геополитички придвижувања во регионот и светот, вели Џафери.
Како што вели, странските пријатели се сигурни дека се внимава околу балансот на силите, затоа што и владата и мнозинството покажале сенс дека го слушаат тоа што треба да се слуша, но дека не прифаќаат ултиматуми, што значи дека постигнале инклузивен процес.
-Референдумот и потребата за уставни измени не се работа на политичките партии и теснопартиски интереси, туку работи што ја решаваат иднината на граѓаните во однос на статусот граѓани на ЕУ, со сите придобивки за исполнување и спроведување на европските вредности и историски момент да се детерминира државотворноста, во смисла дека секој поединец… сега му се обраќам на делот од граѓаните од македонската заедница, кои треба да разберат суштински, а не емотивно, дали сакаат ова парче земја да биде ПЈРМ, која во суштина не е Р. Македонија како што им се пропагира или ќе се дефинира меѓународниот субјективитет на државата, која ќе го добие печатот и поддршката од граѓаните, без оглед на која заедница и припаѓаат, за да може да продолжи во иднина да биде признаен и прифатен меѓународен субјект со име и презиме зачувувајќи ги сите емотивни аспекти што ги поврзуваат луѓето со државата, вели Џафери и додава дека Договорот ги исполнува емотивните потреби на граѓаните и обезбедува меѓународен субјективитет на субјектот Р. Северна Македонија, која ќе биде признаена и прифатена во сите евроатлантски институции.
Џафери ги отфрла како невозможнио сите теории на кампањата за бојкот на референдумот, според кои Грција ги диктира уставните измени што треба да ги направи Македонија.
Тој објаснува дека амандманите не ги предлагаат ниту Заев, ниту Ципрас, туку тоа може само Владата, претседателот на државата, 40 пратеници или 150 илјади граѓани со потпис кај овластен предлагач.