Со 61 глас „за”, 39 „против” и без „воздржани” Собранието вечерва го усвои дневниот ред на 71. седница, постапка што почна од вчера, кога и започна блокадата на законодавниот дом од страна на опозициската ВМРО-ДПМНЕ.

Каква Северна Кореја? Не ми спомнувај Северна Кореја. Немаме ништо заедничко со таа земја, му рече претседателот на Собранието, Талат Џафери на координаторот на пратеничката група на ВМРО-ДПМНЕ, Никола Мицевски откако беше обвинет дека го крши Деловникот на Собранието.

-Немојте сите во хор. Чекајте еден по еден. Колеги од опозицијата, немам никаков проблем со македонскиот јазик и ќе ви читам на македонски, кажа Џафери и започна да го чита предлогот на дневниот ред пред присутните во собраниската сала.

-Прекинете ја седницата, ова е најлошо водење на седница во историјата. Не можеме да се снајдеме во хаосот што го предизвикувате. Не знаат за што да се пријавуваат пратениците. Ова не треба да се случува. Ако имате морал, прекинете ја седницата, рече Мицевски.

„Не ме допирајте не ме напаѓајте“ реагираше Мицевски по што Џафери му рече: „Тргни се оди си на говорница“. По ова Џафери го стави изминатиот дневен ред на гласање, а Мицевски реагираше: „Брука си, срамота, кој дневен ред“.

Собранието попладнево повторно продолжи со работа за утврдување на дневниот ред на 71. седница. Дел од пратениците од опозициската ВМРО-ДПМНЕ повторно бараа промени на дневниот ред, односно дел од точките ставени подолу на листата да се најдат меѓу првите точки за разгледување.

По реакциите и барањата да се достави изменетиот дневен ред седницата беше прекината, а нејзино продолжение Џафери најави за утре напладне.