Претседателот на Собранието, Талат Џафери денеска во изјава за медиумите рече дека членот 33 од Деловникот дозволува група од пет пратеника да формира пратеничка група.
„Од правен аспект е дискутабилен фактот, што една политичка партија не може да има повеќе пратенички групи и поради тоа се создава дилема кај нивниот електорат дали тоа е единствена политичка партија или имаат внатрешни проблеми, па затоа не сакам да им го коментирам овој потег“, рече Џафери.
Претседателот на Собранието рече дека рано е да се каже дали потегот на ВМРО-ДПМНЕ е направен со цел да се блокира работата на Собранието.
„Не можам да ја коментирам нивната одлука за формирање на 10 пратенички групи и не сакам да прејудицирам која е нивната намера. Со нивното делување во Собранието ќе се покаже која им е намерата. Ако се однесуваат како што се однесуваа вчера, тоа значи дека ќе ја искористат можноста низ принципот барање по еден час пауза која координаторот има право да ја побара. Тоа значи дека во 24 часа ќе бараат 10 часа пауза. Тие ќе понесат политичка одговорност за нивното делување“, рече Џафери.
Тој кажа дека на барање на пратеничките групи ја одложил седницата в понеделник.
Џафери рече дека ако процени дека некој сака да ја злоупотреби функцијата пратеник, соодветно ќе реагира.
„Нивното постапување и на секој пратеник ќе резултира со соодветна постапка од моја страна, доколку оценам дека има некоја таква намера. Не сакам однапред да прејудицирам за нечија намера“, рече Џафери.
Според него, менувањето на Деловникот е последен чекор што треба да се преземе и доколку има потреба од такво нешто потребен е политички консензус.
На денешната седница требаше да се продолжи со расправата за разрешување на Републичкиот обвинител Марко Зврлевски, но ВМРО-ДПМНЕ формираше десет пратенички групи и се обиде да ја блокира работата на Собранието.