„Не се чувствувам виновен и одговорен за пријавата која поранешниот претседател на Кривичниот суд, Владимир Панчевски ја поднел против мене. Мислам дека е непотребна и дека треба да се отфрли како неоснована“, рече судијата Иван Џолев на денешната јавна седница во Советот за утврдување на факти.
Според пријавата на Панчевски, на крајот на септември, судијата Иван Џолев, на покана на здружението на судии, отишол во Хрватска на семинар и покрај тоа што по распоред бил дежурен судија за прекршоци кои постапуваат по предмети од јавен ред и мир.
Објаснувајќи како дошло до настанот, Џолев рече дека бил поканет на Меѓународна конференција на судии, а бидејќи бил дежурен во наведениот период, откако не добил одговор на барањата и на телефонските повици да се сретне лично и да го извести Панчевски, му напишал писмо во кое го известил за патувањето и побарал од него да определи друг судија што ќе го замени на дежурство.
„Очигледно Панчевски моето известување за отсуство го третирал како барање и го одбил. На ова, одговорив со резолуција, во која го известив Панчевски дека судијата Насер Хаџиахметагиќ ќе ме менува. На ова не добив никаков одговор, заминав на конференција, а работата не трпеше“, рече Џолев.
Судијата пред Советот посочи дека и во самиот распоред за дежурства што го направил Панчевски, пишува дека судиите можат меѓусебно да се заменуваат на дежурство.
„Јас сум горд што бев на таа конференција. Ова ни е дозволено и во законот за судови ‘судијата е должен да се едуцира, пишува во законот’ “, рече Џолев, цитирајќи членови од законот за судови.
Адвокатот Стеван Павлески очекува Советот да ја отфрли пријавата на Панчевски, која, како што рече е поднесена од ниски и лични побуди.
„Се гледа дека барањето е поднесено од лични и ниски побуди. вакво нешто до сега се нема случено во правосудството и затоа очекувам иницијативата да биде отфрлена“, изјави адвокатот Стеван Павлески.
Комисијата која го испитуваше Џолев ја сочинуваат пензионираните судии и обвинители, Злата Стамболиска и Јордан Лазаров и Кире Секулоски.
Тие во рок од 10 дена треба да поднесат извештај до Советот, кој на седница ќе одлучи дали ќе ја прифати иницијативата и ќе ја препрати до Судскиот совет или ќе ја отфрли.