Џозеф Дол е загрижен поради корупцијата и зависното судство на Балканот и најави борба во наредните месеци против овој феномен кој цути во многу земји околу ЕУ.
Претседателот на Европската народна партија (ЕНП) во која како придружен член се наоѓа ВМРО-ДПМНЕ денес од Конгресот на партијата на Малта изјави:
“Она што се случува околу нас, на Балканот и земјите каде судството не е независно и каде што не може да се нападне корупцијата, е тука јас сум загрижен. Наша етичка задача е ова досие да го отвориме во нашите партии. Судството треба да функционира и да работи.
Во наредните месеци ќе работиме на етиката во нашите партии. Верувајте не е лесно но тоа мора да се направи. Независно судство мора да има во земјите околу ЕУ. На Балканот и во други земји мораме да работиме. Ако не успееме да го менаџираме ова досие, во овие земји нема да има инвестиции и младите нема да сакаат да останат во тие земји”, изјави Дол и најави дека оваа тема и официјално ќе ја отвори денес попладне пред лидерите и шефовите на држави и влади од ЕНП кои доаѓаат од земјите членки на ЕУ но и од балкански земји.
На Конгресот на Малта учествуваат и премиерот Емил Димитриевски и лидерот на ВМРО-ДПМНЕ Никола Груевски.
Дол зборуваше за својот личен пример кога бил под истрага на судството во неговата земја Франција:
“Во Франција, кога има корупција независното судство е задолжено за тоа. Можам за тоа да зборувам затоа што бев под истрага. Имав тотална доверба во судството. Јас и моето семејство минавме низ тежок период. Пет години подоцна ништо не најдоа. Таму каде што има независно судство и правна држава кои се борат против корупцијата – да го оставиме судството да работи”, изјав Дол.
Овие зборови на Дол ја потврдуваат изјавата на германскиот европски пратеник Кнут Флекенштајн од социјалистичката група на Европскиот парламент кој рече дека сите во Македонија треба да знаат дека никој во ЕУ и во ЕНП не ја поддржува политиката на Никола Груевски.
Зборувајќи за Македонија тој вчера во Брисел изјави:
“Сите политички групи треба да критикуваат, повеќе отколку што тоа го правевме досега. За нас социјалистите сега е полесно да критикуваме бидејќи “лошите момци” се од другата страна. Беше поинаку пред неколку години. Критикуваме но зад затворени врати. Јас знам што мислат Дол, Кукан, Макалистер (зн: претседател на ЕНП групата во ЕП) но тоа останува зад затворени врати. Треба да бидеме погласни и да разговараме отворено со пријателите. Демократијата е оштетена”, изајви тој.
Во Македонија, вели германскиот пратеник, не се работи за левица или десница, туку „за демократија – да или не“.
„Јасно е дека гласачите го кажаа своето, и оние што се договорија да формираат влада треба да добијат шанса да владеат. Многу е едноставно“, рече Флекенштајн.