Претседателот на ДИК, Александар Даштевски, демантира дека е дел од било каков партиски оперативен план. Од увидот на спомнатиот документ, евидентно е дека се работи за неофицијален и неавтентичен документ особено што во него е наведен датум 05.12.2024 и истиот предизвикува сомнеж, велат од ДИК за ЦИВИЛ, откако во објавата на СДСМ за „лажните анкети објавени на МТВ се нарачани од штабот на ВМРО-ДПМНЕ“, во оперативниот план на ВМРО-ДПМНЕ се спомнува името на претседателот на ДИК, Александар Даштевски.
Претседателот на ДИК информира дека својата работа ја извршува стручно и професионално, соодветно со законските одговорности и надлежности и согласно Деловникот на Државната изборна комисија.
Аналитичарот Петар Арсовски ги демантира МТВ
Аналитичарот и сопственик на агенцијата „Креатиф“, Петар Арсовски, негира дека тој и неговата агенција имаат какво било учество во спроведувањето на анкетите што се објавуваа(т) во емисијата „Објектив“ на МТВ, како што беше наведено во демантот од МТВ.
„Во истражувањето се вклучени две реномирани агенции (факт кои не се споенува во нападите кон нас) чии сопственици се Петар Арсовски и Владимир Божиновски, а во емисијата учествуваат и реномирани гости од општествено – политичкиот живот во Македонија“, велат од Уредувачкиот тим на МТВ.
Во одговор за порталот „Рацин“ какво е неговото учество во овој проект, Арсовски вели дека тој и неговата агенција не се вклучени во спроведувањето на анкетите и во изведувањето на заклучоците од истражувањата, туку само во делот на анализа и коментар на податоците што ги соопштува агенцијата ИПИС на Владимир Божиновски.
Дехран Муратов / Цивил Медиа