Весна Дамева и Селим Адеми се очекува да бидат избрани за нови членови на Судскиот совет на денешната пленарна седница во македонскиот Парламент, откако нивните кандидатури минаа на собраниската комисија за избор и именување.
Дамева доаѓа по предлог на претседателот Стево Пендаровски како досегашна стручна соработничка во Кривичниот суд во Скопје додека, пак, правникот од Вруток, Адеми е номиниран од ДУИ. Во пакет со нив на Комисијата не мина Павлина Црвенковска, предложена од СДСМ, поради нерешен исход во гласањето (6:6).
„Ако дојде до гласање, а ќе дојде, ќе поминат двајцата. Еден од кандидатите е по предлог на претседателот, а другиот е по предлог на ДУИ. Денеска треба да објавиме нов оглас што ќе трае месец дена за пријавување на нови кандидати од кои треба да се избере еден за комплетирање на Судскиот совет“, вели Мухамед Зекири, потпретседател на СДСМ и пратеник во Собранието.
Тој го оцени како „чуден“ епилогот од последната седница на Комисијата за избор и именување во Собранието.
„Кандидатката на СДСМ не мина за еден глас од ВМРО. Беше чудно што кандидатот на ДУИ мина без никаков проблем. Тројца пратеници од ВМРО гласаа за него, а за нашиот предлог не гласаше никој. Мој впечаток е дека со тоа профункционира коалицијата ВМРО ДПМНЕ и ДУИ во Комисијата за избор и именување во тој дел за да не дозволат да се избере уште еден член и тие да може останат мнозинство во Судскиот совет“, коментира Зекири.
Структурата на собраниската Комисија за избор и именување, чиј претседател е Илија Димовски, е шест члена од ВМРО-ДПМНЕ, пет од СДСМ и по еден од ДУИ и од движењето Беса.
Опозициската ВМРО-ДПМНЕ во текот на вчерашниот ден достави предлог за симнување на изборот на Дамева од дневен ред на денешната пленарна седница што не беше прифатен од парламентарното мнозинство.
На чело на Судскиот совет од пред неколку месеци е Киро Здравев кој на функцијата го наследи Зоран Караџовски. Мандатот на членовите (Миљазим Мустафа, Лорета Горгиева, Зоран Теофиловски, Мирсад Суроји, Киро Здравев, Гордана Спиреска, Сашко Георгиев, Владе Богданоски, Зоран Караџовски, Шемседин Јусуфи, Виолета Богојеска) трае шест години со прави на реизбор како што ќе биде случај со Адеми. Дел од Судскиот совет по функција се и министерот за правда и претседателот на Врховниот суд на кои им престанува членството со повлекување од односните раководни позиции.