Предвремени парламентарни избори кои би се одржале заедно со локалните се единственото решение за кризата во која се наоѓа Македонија, рече техничкиот премиер Емил Димитриев при денешната посета на Делчево.
Тој рече дека дискусиите кои се одвиваат по изборите длабоко допираат во уставното уредување на државата.
„Сметам дека ваквите теми не се привилегија на политичките елити, колку и тие да се сметаат за способни да се справуваат со овие процеси. За вакви теми, единствен фактор кој може да каже и да се изјасни е народот на нови парламентарни избори, кои би биле организирани заедно со локалните. Партиите, сето тоа што сметаат да го работат постизборно, ќе мора да го кажат предизборно, бидејќи за тоа треба да добијат легитимитет, за граѓаните да имаат јасна претстава на кого го даваат гласот и во кој правец ќе се движат работите во иднина“, рече Димитриев.
Коментирајќи ја можноста за отворање бегалски кампови во Македонија, која дојде од шефот на австриската дипломатија, Себастијан Курц, Димитриев рече дека Македонија ќе помага околу бегалците, но е категорично против отворање на бегалски кампови во земјата.