-Правиме се што можеме да го решиме спорот, волја има и од другата страна, вели шефот на дипломатијата Никола Димитров во интервју за „Панорама“, емисија на бугарската национална телевизија БНТ.
Димитров посочи дека има две цели во овој процес: едната е таа што и е потребна на Атина, да има појасна дистинкција меѓу државата Македонија и регионот Македонија во Грција, а второто е тоа да се направи на достоинствен начин и никој да не се чувствува повредено.
-Географско име е и Република Македонија во заграда Скопје, одговори Димитров на новинарско прашање.
Според Димитров, во тек е битка на силите од минатото со силите на иднината.
-Мислам дека е време да и покажеме на Европа дека знаеме и европски да ги решаваме проблемите, изјави тој.
Димитров во интервјуто зборува и за односите со Бугарија по потпишаниот договор за соработка меѓу двете земји. Според него, веќе се чувствуваат бенефитите од него, како што е зголемување на трговската размена меѓу двете земји.
Вчера, грчката телевизија Алфа објави интервју со грчкиот министер за надворешни работи Никос Коѕијас, снимено непосредно по средбата со Димитров во Виена, во кое тој, меѓудругото изнесе личен став дека преферира име со географска одредница на словенски и без превод, и објави и три можни решенија за името: Горна, Северна и Вардарска Македонија.