Министерот за надворешни работи Никола Димитров изјави дека утре е историски ден за Македонија, со кој се отвора иднината.
На денешното отворање на Фестивалот One love tour 2018, на кој беше заедно со шефицата на бугарската дипломатија Екатерина Захариева, Димитров рече дека во текот на утрешниот ден ќе се направи голем чекор за да се затвори едно прашање кое што беше отворено толку колку што е стара независноста на Република Македонија, практично од 1991 година.
– Имаме сили што се борат за напред, за иднината, имаме сили што се борат за назад, за минатото. Минатото не можеме да го смениме, иднината можеме. Мислам дека тоа е многу голем чин, на некој начин бевме охрабрени од Договорот за пријателство со Бугарија. Ова е нашето последно отворено прашање и на некој начин завршува една фаза на прашалници, на предизвици. Многу ќе биде важно овој чин да ги отвори вратите и на ЕУ и на НАТО бидејќи меѓудругото, покрај пријателството со Грција, македонските основни мотиви се да се отворат вратите и конечно да излеземе од таа чекална, каде што сме заклучени премногу години, рече Димитров.
Шефицата на бугарската дипломатија Екатерина Захариева изрази увереност дека по потпишувањето на договорот за името меѓу Македонија и Грција, закажано за утре во Мала Преспа, Македонија конечно ќе може да отпочне преговори за членство во ЕУ, а потоа да добие и покана за влез во НАТО.
– Бугарија сака Македонија на крајот на месецот конечно да почне преговори за членство во ЕУ. Навистина повеќе нема време и ја сум уверена дека по потпишувањето на договорот меѓу Република Македонија и Република Грција утре од срана на двајцата министри за надворешни работи, во присуство на двајцата премиери, на 26 јуни на Советот на ЕУ со кој претседавам јас, Македонија ќе добие зелено светло, вели Захариева.
На потпишувањето на договорот ќе присуствуваат медијаторот Метју Нимиц, еврокомесарите Могерини и Хан и заменичката на Генералниот секретар на ОН, Розмари ди Карло.
За Бугарија е прифатливо името Република Северна Македонија.
– Ние први ве признавме, ја признавме Република Макеоднија во целина. Она што е важно за нас, а го содржи и во нашиот договор дека нема територијални претензии, нагласи Захариева.