Состојбата во Западен Балкан, со акцент на евроинтегративниот процес на регионот, како и ситуацијата во Сирија и Северна Кореја, ќе бидат темите на кои ќе се дискутира на сесиите на неформалниот состанок на Советот за надворешни работи на Европската унија (Гимних), што на 15 и 16 февруари ќе се одржи во Софија, а на кој ќе учествува и шефот на македонската дипломатија Никола Димитров.
Домаќин на состанокот е бугарската вицепремиерка и министерка за надворешни работи Екатерина Захариева, чија земја е актуелен претседавач со ЕУ.
На неформалниот состанок ќе учествува и високата претставничка на Унијата за надворешна политика и безбедност Федерика Могерини, шефовите на диломатиите на 28-те земји-членки, како и министрите за надворешни работи на петте земји кандидатки од регионот Македонија, Албанија, Црна Гора, Србија и Турција.
Димитров во Софија пристигнува утре, каде е предвидено да има билатерални средби со претседателот на Бугарија, Румен Радев, премиерот Бојко Борисов и со неговата колешка Захариева.
Димитров и Захариева на утрешната средба, како што соопшти МНР, е предвидено да ги разменат ратификациони документи на Договорот за пријателство, добрососедство и соработка.
Со тоа практично ќе се заврши формалната постапка за стапување на Договорот во сила, по неговата ратификација во македонското Собрание на 15 јануари и на бугарскиот Парламент три дена подоцна.
Во пресрет на средбата, Захариева денеска во изјава за БТВ, одговарајќи на новинарско прашање, рече дека се радува поради тоа што има напредок во преговорите меѓу Атина и Скопје.
– Тоа е билатерално прашање и да ги оставиме Атина и Скопје да ги водат преговорите со посредство на Обединетите нации, нагласи Захариева и посака успех во преговорите.