Министерот за надворешни работи, Никола Димитров од утре до 17 октомври ќе оствари работна посета на Брисел од каде земјата е во исчекување на одлука за добивање на датум за почеток на пристапните преговори со Европската унија. Од МНР соопштуваат дека Димитров ќе размени мислења со членови на новиот состав на Комитетот за надворешна политика на Европскиот парламент по европските избори во мај оваа година.
„Министерот ќе искористи можност пред европските пратеници уште еднаш да ги претстави постигнувањата на Северна Македонија и важноста од носење на одлуката за почеток на пристапните преговори со Европската Унија на претстојните состаноци на Советот на ЕУ и на Европскиот Совет“, стои во соопштението пред состанокот на Советот на ЕУ и на Европскиот Парламент.
Министерот Димитров за време на посетата ќе оствари и поединечни средби со пратениците од Европскиот Парламент.