Министерот за надворешни работи на Македонија Никола Димитров изјави дека очекува на денешната рунда разговори медијаторот Метју Нимиц да понуди првична рамка што ќе овозможи суштински напредок во решавањето на спорот за името.
Тој смета дека чин на врвна политичка одговорност е да се искористи оваа шанса на позитивна атмосфера за решавање на дводеценискиот проблем, а во однос на исходот од обновениот процес Димитров за Дојче веле изјави: „По природа сум оптимист, а во случајов сум оптимист со грижи.“
„Ние сме решени во рамки на можното да го движиме процесот кон решение. Со Грција сме соседи и вечно ќе бидеме соседи. Но, нештата не зависат само од нас, туку и од другата страна. Во моментов наша највисока одговорност е да направиме се што можеме да го искористиме овој прозорец и да се качиме на европскиот воз, бидејќи за нас таму е перспективата, напредокот, иднината“, рече Димитров.
Пред почетокот на преговорите во Њујорк, медијаторот Нимиц изјави дека предлог решението за името ќе го вклучува терминот „Македонија..
– Терминот „Македонија“ ќе биде содржан во предлог решението за името бидејќи веќе го имаат признаено повеќе од 100 земји во светот, изјави Нимиц за грчката ТВ Антена. Посочи дека името со кое земјата е заведена во ОН е „поранешна југословенска република Македонија“, односно терминот Македонија е дел од името, а и Грција ја има признаено со тоа име.
Нимиц истакна дека нема волшебно решение за името, дека спорот трае предолго и оти натамошното одолговлекување би го направило проблемот уште потежок за решавање, пренесува МИА.