Само што започна денешната пленарна седница на Собранието на Република Македонија, на која се предвидени пратенички прашања, координаторот на Пратеничката група на ВМРО-ДПМНЕ, Илија Димовски, осврнувајќи се на специјалната обвинителка Катица Јанева, порача дека таа вовела нова пракса, односно сите прашања за функционерите во иднина ќе претставувале мобинг.
– Досега беше пракса последниот четврток од месецот да има пратенички прашања. Должност им беше на пратениците да поставуваат прашања од јавен интерес додека јавните функционери да одговараат. Од денеска нормално би се сметало премиерот и своите министри да не одговараат колку и да прашуваме и да не обвинуваат за мобинг и демонстративно да ја напуштат седницата. Ова сознание по 25 години, конечно ни го обелодени еден специјален човек со специјална мисија да не научи дека сме биле во заблуда, рече Димовски на самиот старт на седницата.
Според него, Јанева правела циркус во државата, а потоа дополни дека со цел пратениците да ги сфатат “новите правила на игра“, побара 1 час пауза.
– Апелирам никој да не ме прашува ништо и ако ме прашувате демонстративно ќе ја напуштам седницата, порача Димовски.