Седницата и денеска почна со серија процедурални забелешки на различни теми, поради што беа давани неколку паузи. За дискусија се пријавени 51 пратеник, а во изминатите три дена само тројца го искористија правото на збор.
Оливер Спасовски од СДСМ истакна дека тие всушност дека не се договараат, туку дека разговараат одредени пратеници од политички партии. Истакна дека е точно дека дискутирале да не злоупотребуваат процедурални забелешки, но дека се договориле и други работи.
– Му предложив на претседавачот дека се она што не е тема на разговор, да му се одземе зборот на говорникот, и да не се злоупотребуваат процедуралните забелешки. Се во интерес на граѓаните на Македонија, и тоа претставува наша обврска. Доколку немаме договор, ќе се случува исто како и сега. Секој ќе се јавува процедурално, и ќе зборува за ланскиот снег, но тоа граѓаните не го очекуваат од нас. Се правиме слепи при очи, глуви при уши, рече пратеникот Спасовски.
Веднаш потоа пратениците влегоа во дебата за тоа што е тоа политичко, а што партиско мнозинство.
Пратениците Илија Димовски од ВМРО ДПМНЕ и Џевад Адеми од ДУИ во процедуралните забелешки објаснуваа како изгледала соработката на нивните две партии во претходната Влада.
Вељаноски процедуралните забелешки ги прекина со пауза од половина час, по што дебатата треба да продолжи.