Даут Динарица, еден од сопатниците во возилото „пасат“ кое во петокот вечер беше удрено од „туарегот“ со кој управувал дополнителниот заменик министер Диме Спасов, вели дека се што Спасов кажал во вчерашното интервју е лага, објави „Дојче Веле“.
„Одевме кон паркот кога не удри возило и наместо да застане, продолжи да вози како ништо да не се случило. Поради тоа, свртевме и тргнавме по него, за да му ја видиме регистарската табличка и да го пријавиме во полиција. Се јавивме, го пријавивме бројот на табличката и долго време бевме на телефонска линија со полицијата. Кога возачот запре на семафор, излеговме да му кажеме да застане и да се паркира настрана. Но, тој не застана. Тргна и покрај тоа што во тој момент стигна и полициско возило со ротациски светла. Притоа, не можеше ни да вози право по сообраќајната лента, туку цело време шеташе лево – десно, што укажуваше дека најверојатно е пијан. При тоа бегање удри уште едно возило“, раскажува Динарица.
Тој вели дека тие воопшто не ни знаеле кој е возачот што го удрил нивното возило, а дека станува збор за функционер во владата, дознале дури кога полицијата го легитимирала, откако излегол од возилото.
„Не сме му се заканувале на возачот со никакви пиштоли. По снимката што вчера ја објавија некои медиуми, беше речено дека лицата кои држат оружје биле оние од „пасатот“. Пиштоли си имаа полицајците. Истите тие полицајци и нас не легитимираа и не претресоа. Кај нас не најдоа никакво оружје. Кој сака може да го провери тоа во полиција, ако е целта да се дознае вистината. Но, од ова што го гледаме и слушаме, изгледа дека целта е да шират лаги, само за да се оправда постапката на Диме Спасов“, вели Динарица.
Вчера, на прес конференција, министерот за внатрешни работи, Оливер Спасовски, рече дека има аудио и видео докази дека никој не му се заканувал на Спасов со пиштоли, а тоа го потврдила и Т.К. сопатничката на дополнителниот заменик министер.
Според информации на медиуми, Т.К. доцна вечерта во полициска станица го сменила исказот кој првично го дала во полиција.
Дополнителниот министер за труд и социјала вчера во интервју рече дека тоа што се случило во петокот е криминално политичка местенка и дека луѓето што го бркале му се заканувале со пиштоли и тропале по возилото.