Т.К. сопатничката која била во возилото со дополнителниот заменик министер Диме Спасов во петокот кога тој предизвика неколку сообраќајни прекршоци, за полицијата изјавила дека никој ниту го буткал возилото, ниту пак биле нападнати од некого, соопшти денеска на прес конференција министерот за внатрешни работи Оливер Спасовски.
За сообраќајните прекрошоци кои Спасов ги направи со возило на Агенцијата за вработување ќе добие три прекршочни пријави
Пријавите се за тоа што го напуштил местото на настанот, не постапил по барањата на полицијата и затоа што возел со неприлагодена брзина.
Спасовски рече дека постојат аудио и видео записи дека Спасов го управувал возилото и дека не бил ниту бркан ниту пак нападнат од кого било.
-Лицата кои го пријавија дополнителниот заменик министер Диме Спасов, цело време додека возеле зад него зборувале со службеникот на МВР на бројот 192 каде и пријавиле дека некој им го удрил возилото. Сите разговори се снимаат и се зачувани и според тоа може да се открие дека никој не му се заканувал или го тепал Спасов, изјави Спасовски.
Спасовски уште рече дека досега дополнителниот заменик министер не поднел кривична пријава против лицата кои наводно му се заканувале и биле опасни по неговиот живот, што според Спасовски не е логично, бидејќи ако некој ја загрозува твојата безбедност ќе поднесеш кривична пријава, а не само да даде поплака кога ќе дојде во полиција.
Спасовски ги отфрли обвинувањата на Спасов кој во интервју за ТВ Нова рече дека тоа што му се случило во петокот е криминално политичка местенка и дека дополнителниот заменик министер има лоши советници кои му даваат лоши насоки.
Министерот исто така рече дека пријава против полицајците нема ни во внатрешна контрола, која би требало да ги разгледува оние случаи за кои Спасов говори. Исто така, Спасовски информираше дека додека Спасов бегал со возилото, не застанал ни на повикот на полицијата, ниту пак на знаците кои тие му ги давале. Токму за ова се однесува едната прекршочна пријава.
Спасовски информираше дека ќе има санкции и против возачот на Диме Спасов М.Т. од Министерството за труд и социјална политика кој во петокот вечер се обиде да го спаси својот шеф и во полиција се пријави дека тој го возел автомобилот со кој се направени неколку сообраќајни прекршоци.
Спасов денеска во интервју за ТВ Нова информираше дека не е виновен и дека бил нападнат.
„Во таква тензична атмосфера, каде што најпрво бев следен, потоа и на два пати по ред, на два обиди, се обидоа напаѓачите да ме извадат од возилото и физички да ме нападнат. Потоа се обидов да бегам, бев нападнат и од лице коишто примени сила врз мене и впери оружје, впери пиштол во мене. Покрај тоа, на напаѓачите коишто ме следеа, не беа преземени врз нив никакви мерки, односно следеа и ја набљудуваа ситуацијата откако застанавме. Заклучив дека се работи за криминално-полициска конструкција, за смислена местенка којашто има за цел да го наруши мојот углед и да нанесе штета врз мене, а постоеше и опасност по мојата безбедност, меѓутоа опасност и по мојот живот“, рече Спасов.