Невин сум, не нападнаа, вака дополнителниот заменик министер Диме Спасов се бранеше по инцидентот од минатиот викенд во којшто полицијата тврди дека предизвикал полесни сообраќајни незгоди, бегал од полицијата и сето тоа го направил со службеното возило. Спасов, кој цела недела бега од новинарите, а истото го направи и минатата сабота пред полициската станица, денеска даде интервју за телевизијата Нова и рече дека тоа што се случило во петокот било класична полициско криминална местенка за да се наштети на неговиот углед.
Спасов рече дека по шест дена одлучил да излезе во јавност, затоа што го видел извештајот на Министерството за внатрешни работи, кој според него повеќе личел на партиско соопштение, отколку на полициски извештај.
Не јасно е како го Спасов го видел полицискиот извештај на Министерството за внатрешни работи, кога тој се уште не е објавен.
„Во таква тензична атмосфера, каде што најпрво бев следен, потоа и на два пати по ред, на два обиди, се обидоа напаѓачите да ме извадат од возилото и физички да ме нападнат. Потоа се обидов да бегам, бев нападнат и од лице коишто примени сила врз мене и впери оружје, впери пиштол во мене. Покрај тоа, на напаѓачите коишто ме следеа, не беа преземени врз нив никакви мерки, односно следеа и ја набљудуваа ситуацијата откако застанавме. Заклучив дека се работи за криминално-полициска конструкција, за смислена местенка којашто има за цел да го наруши мојот углед и да нанесе штета врз мене, а постоеше и опасност по мојата безбедност, меѓутоа опасност и по мојот живот“, рече Спасов.
Исто така, Спасов не зборуваше за дилемите кои се поставија во јавноста, а кои можат да ги разнишаат тезите кои тој денеска ги изнесе. Зошто Спасов бегал од полицијата доколку навистина го бркале криминалци кои сакаат да го убијат; зошто неговиот возач вработен во министерството за труд и социјална политика се обидел да го спасува и ноќта по инцидентот пред полицијата тврдел дека тој возел; зошто го оставил сопатникот ако навистиан биле во животна опасност; зошто сопатникот дал друга верзија за настанот; зошто го возел службениот автомобил во петок по полноќ. Овие прашањата не беа одговорени за јавноста, а водителката на интервјуто не ги постави.
Инаку според првото соопштение на МВР, во петокот Спасов возејќи службено возило на Агенцијата за вработување, удрил две возила и додека полицијата ја евидентирала неговата сопатничка, избегал од местото на настанот.
Откако Спасов избегал од местото на настанот каде што бил застанат од полицијата дошол возач од Министерството за труд и социјала и се пријавил дека тој го возел автомобилот.
Од петокот до денешното интервју, Спасов не се појави во јавноста да објасни што точно се случило.