Директорот на домот „25 Мај“, чувствува морална одговорност за сексуалното злоставување на тринаесетгодишната малолетничка.
-Јас од морален аспект секако дека чувствувам одговорност и не може да ми е сеедно, апсолутно, Најодговорно тврдам дека никој од установата ниту бил инволвиран, ниту злоупотребувал деца, ниту ги наведувал на некакви негативни дејанија. Сето тоа што се случувало надвор од установата, вели Стево Соколовски, директор на јавната установа за деца со воспитни и социјални проблеми „25 Мај“, во изјава за ТВ 24.
Тој најавува дека во понеделник заедно со министерката за труд Мила Царовска ќе излезат со повеќе детали за случајот кој ја вознемири Македонија.
Шокантниот случај на злоставувавното 13 годишно ромско девојче го обелодени пред два дена Европскиот центар за правата на Ромите, кое, како што тврдат било изложено на сексуално злоставување како штитеничка на државната институција за згрижување деца „25 Мај“ во Скопје.
МВР соопшти дека девојчето штитеник на ЈУ за згрижување на деца со воспитно-социјални проблеми, од крајот на 2016 и во текот на 2017 година и 2018 година девет пати било пријавувано за исчезнато лице од страна на вработени во социјално-згрижувачките установи, при што во сите девет случаи.
Во документираните случаи, МВР разговарале со лица инволвирани во незаконски дејствија од областа на кривични дела против половата слобода, за што се направени детални известувања доставени во надлежното ОЈО за натамошно постапување.
МТСП тврди дека за посочената малолетничка имало посебна грижа, но тоа не дало никакви резултати.
Секој пат кога девојчето го снемувало од Домот, старателот пријавувал во МВР.
Од Министерството негираат дека таа била жртва и на социјален работник.
УНИЦЕФ смета дека случајот со злоупотребата на малолетното девојче од јавната установа е показател дека институционалната грижа не може да обезбеди соодветна заштита на децата од повреда. Според претставникот на УНИЦЕФ во Македонија Бенџамин Перкс, решение треба да се бара во трансформирање на овие институции и згрижување на децата во семејна средина како мали групни домови, но и во зајакнување на капацитетите на социјалните служби, полицијата и вработените во образованието и здравството.
Од Меѓаши пак апелираат на поголема одговорност од надлежните институции.
Според кривичниот законик, на злоставувачот му се закануваат најмалку 12 години затвор. Но, обвинителството допрва треба да утврди против колку лица ќе се води постапка за полов напад врз малолетник кој е помал од 14 години. Од Јавното обвинителство не одговорија дали веќе има оформено предмет.
Според извештајот на Европскиот центар за правата на Ромите покрај овој случај, постоеле уште два случаи кои исто така биле штитенички на домот за згрижување деца 25 Мај и двете сестри биле на возраст од 13 години и 16 години.