Пред малку беше прочитана пресудата за обвинетите во случајот „Диво насеље“. На казна доживотен затвор се осудени седуммина, 13 добија по 40 години затвор, шестмина по 20 години, двајца по 14 години затвор. Еден е осуден на 18 години затвор, тројца на 13 и еден на 12 години затвор.
Од вкупниот број на 37 обвинети, 33 се прогласени за виновни, а четворица добија ослободителни пресуди.
Обвинетите кога се читаше пресудата не беа во судницата, туку ја слушаа само новинарите, адвокатите и роднините на обивнетите. Тие беа изнесени од судництата, бидејќи викаа УЧК и ја пеаја албанската химна. На судот му дофрлаа дека тие не се терористи, туку дека терористи се оние кои влегоа во Парламентот на 27. април и ги тепаа пратениците.
Додека во судницата на скопскиот Кривичен суд се чекаше соопштувањето на пресудата, еден од роднините пред судот, се обиде да влезе во судот, но беше спречен од полицијата.
Како што јави репортерот на НОВА ТВ, при интервенцијата мажот беше соборен и приведен.
Засега нема детали за овој случај.