Посетата на американскиот секретар за одбрана Џејмс Матис на Македонија, што треба да се оствари овој викенд, е огромен сигнал дека сите овие процеси се важни за Вашингтон, бидејќи главниот интерес на Вашингтон на Балканот е стабилност и да нема нови проблеми во регионот, изјави денеска шефот на дипломатијата Никола Димитров по средбата со неговиот албански колега Дитмир Бушати.

Во однос на интензивните посети на истакнати европски и светски дипломати на Македонија пред претстојниот референдум, Димитров рече оти светот видел решителност на Македонија да се соочи со проблемите, да ги затвори заедно со соседите, и да тргне напред и тоа, рече, е во основата на силната дипломатска поддршка.

– Во светот во моментов има премалку решавање на крупни проблеми. Ова е проблем што нас не држеше заклучени и назад три децении и оттука ова е шанса не само за Македонија, туку и за Балканот и за цела Европа да се затвори едно прашање, да се направи напредок и чекор кон просперитет и кон стабилност пред се за нас но и за целиот регион, рече Димитров.

Во врска со неодамнешните коментари во медиумите дека за првиот референдум за независност во 1991 година немало толку посети на странски дипломати, Димитров рече оти доколку имало, веројатно Македонија немала да чека две години од референдумот до членството во Обединетите нации.

Посетите на Македонија што во изминатиот период ги прават важни политички личности од НАТО и ЕУ, според министерката за одбрана Радмила Шекеринска, е уште една потврда дека државата е насочена кон вистинскиот правец, поради што ја добива таквата поддршка.

– В понеделник во посета ни доаѓа првиот човек на Пентагон, првиот човек на најмоќната армија во светот Џејмс Матис, што се случува првпат во последните 14 години. Заборавивме како изгледа посета на министер или секретар за одбрана на САД, иако оваа држава е наш стратешки политички и воен партнер. Тоа покажува колку е голем интересот за нас и поддршката за она што ние го сработивме во последната година, изјави вчера Шекеринска во Кочани.

– Ќе одам да ги посетам нашите македонски пријатели и да им ставам до знаење дека Вашингтон го поддржува македонскиот народ, стои во неговата изјава и се додава загриженоста дека Русија би можела да се обиде да се вмеша во референдумскиот процес, изјави спроти посетата Матис.

Дојче Веле објави дека посетата на Матис е поврзана со неговата загриженост за Русија би можела да се обиде да се вмеша во исходот на референдумот, од чиј успех зависи членството на Македонија во НАТО.

Матис е највисокиот државен претставник на САД кој ќе дојде во Скопје во пресрет на референдумот.