Над 500 доктори-специјалисти како и над 150 студенти по медицина во Канада, бараат властите да го повлечат најавеното зголемување на нивните плати и парите да ги потрошат на подобрување на условите за пациентите и ресурси за медицинскиот персонал.
„Единствената работа која е имуна на намалувања се нашите плати“, се наведува во отворено писмо на организацијата на медицински работници од Квебек, поставено на нивниот блог, објави Си-Ен-Би-Си.
Претседателката на организацијата ЦБС Монтреал, д-р Изабел Лебланк, изјавила дека информациите за покачување на платите на докторите доаѓаат во исто време кога медицинските сестри се мобилизираат да протестираат за нивните работни услови, а на овој начин тие сакаат да се солидаризираат со нивните заложби.
„Доколку нашите колеги се посреќни, доколку нашите пациенти добиваат подобра грижа, сите ќе бидеме победници, а тоа нема да се случи преку покачување на платите“, изјавила таа.
Како дел од договор постигнат минатиот месец, 10.000 специјалисти по медицина во Квебек треба да добијат покачување на платите од 1.4 проценти годишно до 2023 година.
Според податоците на Канадскиот институт за здравствени информации, специјалистите во Квебек заработуваат околу 403,5 илјади долари годишно.