Кошаркарскиот шампионски трофеј во нова канцеларија. Сместен е во Градски парк и до овој период во наредната година ќе биде декор во клупската витрина на Работнички. „Центарци“ го детронизираа МЗТ Скопје во финалната плеј-оф серија, прва за нив по пауза од четири години, откако го добија и третиот судир со аеродромци со 87:84 (по четвртини: 16:25, 24:23, 17:15, 30:21) за прослава на 15. титула и прекин на деветгодишниот пост.
„Со само два пораза стигнавме до титулата што прави да се чувствуваме среќни, задоволни, исполнети. Одигравме одлична сезона, завршиме одлична работа, направивме голем подвиг. Зад нас се три израмнети меча против МЗТ Скопје, особено последниот кој беше тежок од психолошки аспект, но издржавме и ја вративме титулата каде ` и место“, истакна Марин Докузовски, тренер на Работнички, по прекинот на доминацијата на МЗТ Скопје во домашната кошарка.
Работнички беше убедливо најдобар, најконстантен, низ целата сезона. Изгледаше недопирлив за конкурентите од кои само Куманово и МЗТ Скопје успеаја да слават над новиот првак. Кумановци се радуваа со 83:82 на 11 април оваа година, а на почетокот на сезоната (7 октомври) паднаа во продолженија (мечот во основниот дел заврши 81:81) додека „металците“ на 3 мај триумфираа како домаќини со 80:76. Се останато беше во знак на тимот од Градски парк.
„Уф… Ми беше тешко, ми беше најтешко што бев крај теренот и не бев во состојба да помогнам. Минав низ две комплицирани операции во животот по што бев воден од две желби. Да играм кошарка и да освојам титула за Работнички. Страсно ја посакував втората и еве сега, конечно, ми се исполни“, изјави Димитар Мираковски, капитенот на „центарци“.
Работнички суверено владееше со македонската кошаркарска сцена по поразот на поранешната држава. Шампионскиот поход го почна во 1993 година и до 1999 година нанижа седум првенствени трофеи на кои додаде уште шест во периодот 2001-1006, на првата наредна чекаше до 2009 година, а на најновата досега. „Центарци“ имаат и 13 победи во Купот на Македонија и една во Суперкупот (2011 година). Лани учествуваа во квалификациите за Европа купот на ФИБА пришто беа елиминирани уште на стартот од руска Парма од Перм. Очекувањата за наесен одат во насока на повторен излез на меѓународната сцена, а дали паралелно ќе бидат дел и од регионалната, во случајот АБА 2 лига, ќе биде дополнително одлучено.