Гласачите сами да проценат за кого ќе гласаат во вториот круг на локалните избори.
Движењето „Одлучно за промени” составено од ДОМ и ЛДП останува во владината коалиција. Оттаму соопштуваат дека остануваат во владината коалиција, но најавуваат дека по вториот круг од локалните избори, ќе се размислува за промени.
– Сериозно ќе разговараме со нашите политички партии да се смени нешто во начинот на владеење. За вториот круг сметаме дека нашите гласачи се доволно интелигентни и не треба да ги насочуваме за кого да го дадат гласот, порачаа лидерката на ДОМ, Маја Морачанин од Движењето „Одлучно за промени”.
Морачанин денеска ги демантираше шпекулациите дека се во преговори за ново парламентарно мнозинство. Посочи дека сето она што граѓаните им го кажаа и во кампања и пред кампања и на самиот изборниот ден, е она што мора понатаму да се преточи во реализација, и да продолжи државата да оди напред по еден прогресивен европски пат.
Лидерот на ЛДП, Горан Милевски истакна дека добиените 30 илјади гласови не смеат да ги изневерат. И тој потврди дека остануваат во владината коалиција, бидјеќи според него, Владата има сериозни предизвици во започнување на разговорите со ЕУ, и смета дека е несериозно да се наруши тој пат.
– Според нашите сознанија од нашите парнтери од Брисел, очекуваме позитивна одлука и деблокирање на процесот на европските интеграции. Мислам дека нема логика Владата да се нарушува, но повторно ние гласот на граѓаните сериозно ќе го послушаме. Како ЛДП и како ДОМ сериозно ќе разговараме со нашите партнери за продолжување на соработката, рече Милевски.
Од владиниот коалиционен партнер на СДСМ, партијата Беса, со која раководи Биљаљ Касами, а во вториот круг во Тетово негов против кандидат е Теута Арифи од ДУИ, другиот владин коалициски партнер, соопштија дека владиното мнозинство е стабилно.
– Воедно сакаме да ја информираме пошироката јавност дека владината коалиција е стабилна без разлика дека на многу места во вториот круг се натпреваруваме меѓу себе, наведуваат од Беса.