Пратеничките од партијата за Демократска обнова на Македонија (ДОМ), Маја Морачанин и Лилјана Поповска, остварија средби со претставници на граѓански здруженија од иницијативата против изградба на гасовод по сртот на парк-шумата Водно.
Сите аргументи на екологистите и на стручните лица укажуваат на потреба за преиспитување и промена на трасата на гасоводот, тргнувајќи од значењето на Водно како прочистувач на воздухот и извор на кислород за граѓаните на Скопје и околните места.
Во просторниот план на Република Македонија оваа парк-шума е дефинирана како заштитен предел со посебни природни карактеристики и предвиден е режим за заштита како дендролошки споменик на природата.
Дополнително, Водно е најзначајното излетничко место на главниот град, а нејзиниот с’рт е дел од туристичката рута за планинари и велосипедисти што води кон македонските туристички атракции, кањонот Матка и пештерата Врело.