По денешниот распит во Кривичниот суд во Скопје, судија на претходна постапка им изрече мерка – куќен притвор на пратениците Жаклина Пешевска, Јохан Тарчуловски и Љупчо Димовски.
Претходно судот на тројца пратеници – Љубен Арнаудов, Крсто Мукоски и Сашо Василевски им изрече мерка притвор, по што тие со лисици на рацете беа спроведени во Истражниот затвор „Скопје“.
Распитот на пратениците траеше неколку часа. Тие одделно дојдоа во судот, а куса изјава за медиумите пред влегувањето даде само пратеникот Мукоски, кој рече дека правно гледано, според него, нема аргументи за притвор, но, како што наведе, остава на судот да одлучи за тоа и верува во него.
Шесттемина пратеници пред судот ги пречекаа и неколкумина нивни колеги од пратеничката група на ВМРО-ДПМНЕ за да им изразат поддршка.
Овие пратеници се дел од 36-те лица кои Основното јавно обвинителство ги гони за „терористичко загрозување на уставниот поредок и безбедноста“, во врска со настаните од 27 април годинава во Собранието на Република Македонија.
Во петокот, Собранието на Република Македонија им го симна имунитетот, а известувањето до Кривичниот суд од Парламентот пристигна вчера по што тоа беше доставено на надлежните судии на претходна постапка, со што се создадоа услови да се постапува по предлогот на обвинителството.