Каратистите на Макпетрол со грст медали на Државното сениорско првенство што се одржа викендот во Скопје, а кое беше квалификациско за влез во репрезентацијата за претстојниот Европски шампионат во март во Азербејџан. Неговите членови освоија вкупно 13 одличја од кои девет златни, еден сребрен и три бронзени.
Државни прваци во поединечна конкуренција станаа Сара Радичевска во категоријата до 50 килограми, Симона Заборска во категоријата до 55 килограми, Ангела Мојсовска во категоријата до 68 килограми, Абдурахим Идризи во категоријата до 60 килограми, Петар Заборски во категоријата до 75 килограми, Петар Спасеновски во категоријата до 84 килограми и Моника Стефановска во категоријата над 68 килограми.
Популарните „нафташи“ се искачија на највисокото место на пиедесталот и во екипно во борби – женскиот тим во состав Сара Радичевска, Симона Заборска, Ангела Мојсовска и Моника Пендаровска, како и машката екипа (Петар Заборски, Петар Спасеновски, Роберто Ацкогвски, Глигор Петков, Абдурахим Идризи, Глигор Станоев и Давид Петков).
„Презадоволни сме задоволни од постигнатиот резултат. Во секоја од десетте тежински категорија, атакувавме на првите позиции пришто успеавме да направиме одлични резултати. Освоивме вкупно девет златни медали, податок кој доволно кажува за нашата доминација на ова првенство. Моментно имаме генерација и тимови како никогаш досега и во машка и во женска конкуренција. Сплотени сме, работиме по двапати дневно, а како резултат на тоа дојдоа и златните медали во борби во машка и во женска конкуренција“, вели тренерот на Макпетрол, Бошко Заборски.
Единственото сребро го освои Петар Спасеновски во категоријата до 84 килиограми по неизвесната борба со Берат Јакупи, па останува да се види дали селекторот Сашко Арсовски ќе реши да му даде шанса за Спасеновски, кој покрај одличните настапи на ова првенство, лани беше и европски првак и годината ја заврши како првопласиран на БКФ ранг листата. Во вториот натпреварувачки ден (плејофот), бронзи кон златните медали додадоа Моника Пендаровска (-61 кг.), Петар Заборски (-75 кг.) и Глигор Петков (-84 кг.).