Published: Wednesday, October 20, 2021 14:29
Ќе продолжиме заедно да ја носиме државата напред, коалициските партии со поддршка за СДСМ, само сите заедно можеме да направиме пресврт и во вториот изборен круг да обезбедиме победа, а со тоа поддршка на владините политики кои се во интерес на граѓаните, се наведува во речиси сите соопштенија од партиите кои се дел од Владината коалиција во обид да ги демантираат шпекулациите, како што велат, дека ја напуштаат власта.
-Демократскиот сојуз, како дел од стабилното владино мнозинство, цврсто стои на ставот дека ќе продолжиме заедно со цел Македонија да се движи напред. Демократскиот сојуз ги повикува своите членови и симпатизери, како и сите граѓани, на 31 октомври 2021 година, да излезат масовно и да гласаат за кандидатите за градоначалници на коалицијата предводена од СДСМ, се наведува во соопштението од ДС на Павле Трајанов.
Од Демократскиот сојуз на Власите велат дека остануваат во коалицијата зашто препознаваат вредности со кои Македонија продолжува напред кон демократскиот и европскиот пат.
-По последните шпекулации околу стабилноста на Владината коалиција кои се само обиди за замајување на јавноста, Ве известуваме дека нашата коалиција е стабилна, Владиното мнозинство е стабилно и работи исклучиво во интерес на граѓаните. За само неколку години оваа коалиција ја врати државата на прав пат, решавајќи ги децениските прашања. Впрочем народот не заборава како е да се живее во затворена земја и режим, а како во демократија со европска иднина, се наведува во соопштението од ДСВ.
Партијата НСДП, предводена од Тито Петковски, останува дел од владејачката коалиција и по локалните избори, соопштија од партиската прес-служба.
-Резултатите од првиот круг на локалните избори, поддршката од граѓаните што ја добивме како коалиција, создава дополнителна обврска да продолжиме напред, да ја почитуваме нивната изразена волја, да ја развиваме локалната демократија и ги штитиме државните интереси. НСДП е цврста и единствена во одлуката за останување во владејачкото мнозинство и продолжување по политичкиот пат кој води кон прогрес на државата, за активно партиципирање во креирањето и спроведувањето на национални и локални политики кои се во функција на интересот на сите граѓани“, велат од НСДП на Петковски.
– Во пресрет на локалните избори, партијата реши да настапи во рамки на коалицијата „Најдоброто за мојата општина“, а за вториот круг, кој треба да се одржи на 31 октомври, од НСДП ги повикуваат граѓаните да гласаат за коалицијата бидејќи тоа, според нив, е најдобрата понуда како за општините така и за државата и стратегиските определби за евроинтеграцијата.