Демократката унија за Албанците ги демантира тврдењата на претседателот Ѓорге Иванов во интервјуто за австриски „Винер Цајтунг“, објави Алсат. Од партијата велат дека не е точно дека коалицијата меѓу ВМРО-ДПМНЕ и ДУИ пропаднала поради телефонски повик.
„Првин, ги негираме овие наводи, станува збор за клевети. Ниту еден фактор од надвор не влијаеше врз одлуката на ДУИ. Нашата одлука беше консензуална и внатрепартиска токму во моментот кога констатиравме дека коалицирањето со ВМРО не ги исполнува нашите очекувања во оваа консталација. Така што уште еднаш ќе ги отфрлам овие клевети кои Иванов ги користи за дневна политика. Ние сметаме дека политичките партии треба да го почитуваат потпишаниот договор во Скопје и во интерес на граѓаните да излеземе од кризата што поскоро“, изјави Бујар Османи, Портпарол на ДУИ
Во вчерашното интервју, меѓудругото, Иванов рече дека коалицијата меѓу долгогодишните партнери била договорена, но партнерството пропаднало поради еден телефонски повик.
„Коалицијата всушност беше договорена. Но, во последниот час имаше телефонски повик – и коалицијата се распадна“, изјави Иванов во интервјуто.