„Која европска држава би прифатила платформа на туѓа држава, да биде основа за создавање на влада кај неа. Ако се загрозува независноста на државата, и ако државата се доведува во подредена состојба и зависност од друга држава, тоа кај нас е казниво дело“, вели претседателот Ѓорге Иванов, во интервју за австрискиот дневен весник „Винер цајтунг“.
Иванов во интервјуто рекол и дека Тиранската платформа е директно мешање, но и загрозување на независноста на Македонија, а содржинските барања не се само политички опасни, туку се и противуставни.
„Ние сме мултиетничка демократија, во која никој не е дискриминиран поради неговата припадност кон некој народ и никој не е исклучен. Во Владата има етнички Албанци како Министри за одбрана и како Министри за европски прашања. Ние сме држава на граѓаните на Македонија. Но, етничките Македонци се народ за себе, бидејќи овде си го оствариле правото на сопствена држава. Турците своето право на своја држава го оствариле во Турција, Србите во Србија“, рекол Иванов.
Ова, според него, важи и за Албанците кои го оствариле своето право на сопствена држава во соседна Албанија, а сега, како што изјавил, дури и во Косово.
„Ако македонските Албанци сакаат да бидат конститутивен народ во Македонија, тогаш сакаат правото на сопствена држава да го реализираат и овде, без да ги земат предвид државните граници на Македонија. Ова го предвидува платформата од Тирана. Тогаш по Албанија и Косово, Македонија би била третата албанска држава. А дали е можна и федеративна Грција, бидејќи и таму живеат приличен број на Албанци?“, вели Иванов за „Винер Цајтунг“ и додава дека „сакаме интеграција, а не гетоизација на Албанците во Македонија“.
Во врска со можноста да се бира влада во Собранието, без определен мандат од страна на претседателот, Иванов смета дека „тоа е само желба, правно неиздржано и таквата влада нема да има легитимитет“.
Доколку такво нешто се случи, тогаш според Иванов, би имало две влади- актуелната, која е техничка влада, и влада која што е без легитимност од претседателот, односно без уставна основа, што ќе значи влегување во уште поголема криза.
За неуспешниот обид за коалиција меѓу ВМРО-ДПМНЕ и ДУИ, Иванов вели „коалицијата всушност беше договорена. Но, во последниот час имаше телефонски повик – и коалицијата се распадна“.
Иванов повторува дека дури и да се избере претседател на Собранието, а лидерот на СДСМ се договори со партиите на Албанците за составување влада, тој на таква коалиција нема да го даде мандатот, и тоа од политички причини.
„Заев не дозреал за улогата што му ја дале. Се преценил и самиот тој, а го прецениле и тие што му дале да игра таква улога. Во политиката треба да има дијалог и компромис, а тој не сака да разговара. Која и да е коалиција создадена под уцена е нестабилна. Уставот се менува со двотретинско мнозинство. Но Заев ќе настојува да се донесат тие закони во Парламентот, за јас да ставам вето јас на нив, а Уставниот суд да покрене иницијатива и да ги поништи тие закони. Тоа ќе го прави Заев за да после ме обвини мене дека сум антиалбанец. Сфаќате колку е перфидна играта“, вели тој.
Според него, Заев сака само да дојде на власт, а ги изгуби изборите во декември.
„Јас сметам дека тој не знае во каква игра се вмешал. Тој беше заслепен од желбата да дојде на власт. Сега се наоѓа во деликатна ситуација. Доколку не успее да дојде на власт, би можел да заврши в затвор“, прогнозира Иванов и објаснува дека не се заканува, но, македонските институции во даден момент ќе постапат против него, ќе ги истражуваат сите околности.