По две и пол години затвор добија двајцата штипски насилници кои во јануари малтретираа и тепаа 21 годишна девојка. Насилството притоа го снимаа на мобилен, а материјалот беше објавен на социјалните мрежи на 2 април. Пресудата е објавена денеска во штипскиот Основен суд во присуство на жртвата, но не и на насилниците, ниту на нивниот бранител.

Поради посебните мерки, пресудата се читаше со минимално присуство на роднини и новинари. Судијата образложи дека како олеснителна околност за сторителите е земено во предвид нивното признавање на вина, изразување на каење, како и дека досега не сторителе кривично дело.

Бранителката на жртвата, Билјана Андонова се надева дека изречената казна ќе делува на обвинитетите и да сфатат што сториле, да се покајат, но и да се подобрат како личности.

„За оштетената не можам да кажам дали ќе биде задоволна или не. Затоа што ниту една казна не може да и го надомести сето она што го претрпи и што цела јавност го виде преку видеото. Искрено се надевам дека со оваа пресуда ќе се прати јасна порака и апел до цела јавност за нулта толеранција на ваков вид на насилство. Се работи за родово базирано насилство што е сторено врз млада девојка. Сметам дека казната ќе има, пред сè, генерална превенција за целата јавност“, рече Андонова.

Таа истакна дека со жртвата изминатиот период работеше Мултисекторскиот тим на ЕХО. Адвокатот на сторителите на насилството, Валентин Зафиров, оцени дека казната е висока, а дали ќе ја обжалат на повисок суд ќе треба прво да ја види на писмено, но и да се консултира со двајцата клиенти.

Од Обвинителството информираат дека по добивање на пресудата во писмена форма, ќе одлучат кои чекори ќе бидат преземени натаму за овој случај. Согласно Кривичниот законик за сторено кривично дело „насилство“, казната затвор е од шест месеци до пет години. Судијата денеска на сторителите, кои се наоѓаат во истражниот затвор во Куманово, им ја продолжи мерката притвор.