Џамиите во тетовско ги отворија вратите за муслиманските верници за утринска молитва Сабах Намаз, како што имаше дадено насоки Исламската верска заедница (ИВЗ), но две џамии останаа затворени. Се работи за верските објекти во тетовските села Порој и Глоѓи.
„Јас само ги почитувам мислењата на експертите во време на пандемија да нема групирања. Џамијата е Божја куќа, верникот кога доаѓа да се моли во џамија треба да биде слободен. Оваа одлука ја има низ целиот свет, ја има во Саудиска Арабија, во САД, во Турција каде има воведено неколкудневен полициски час со цел да се заштитат верниците. Јас знам дека на оваа моја одлука ќе има и има негодувања, но има и доста верници кој ја поздравуваат мојата одлука, но за мене, пак ќе кажам, е најважно да го заштитам здравјето на моите соселани“, вели имамот на џамијата во Порој, Максум Абази.
„Ние одамна сме расчистиле со реисот Сулејман Реџепи. Уште од 2006 година. Само носиме одлуки како ќе функцинира нашата џамија така и сега донесовме одлука каква што сметаме дека треба да се донесе. Се дистанцираме од него и од неговите одлуки. Парите кои ги собираме од верниците не ги даваме на ИВЗ, туку ги даваме за селото. Со нив имаме направено паркови, сме поставиле урбана опрема, јавно осветлување и слично“, вели имамот Максути.
Ги запрашавме верниците дали се согласуваат со одлуката на имамот да се дистанцира од сите одлуки на реисот, но не добивме конкретен одговор. Ни одговорија дека без имамот во селото не може да се изгради ниту постави некавка инфраструктира. Без него, како што велат, селото би немало никаков просперитет.
Освен во Порој и џамијата во тетовското село Глоѓи, Општина Теарце, утринава не ги отвори вратите за верниците. Таму имамот не го затекнавме, но имаше членови од одборот на џамијата од кои го добивме следниот одговор.
„Ние не сме против одлуките на ИВЗ и реисот Сулејман Реџепи, но одлучивме да не ја отвориме џамијата затоа што е мала и ќе сакаат да дојдат сите верници, а во време на пандемија тука не би можело да се одржи дистанца и останатите препораки на властите. Затоа одлучивме џамијата да биде затворена, здравје ќе дојдат подобри времиња, па пак луѓето ќе го посетуваат слободно божјиот храм“, велат од одборот при џамијата во тетовското село Глоѓи.
Инаку денеска во тетовско, џамиите беа полни со верници. При влез се дезинфицираа, а им се делеа и заштитни маски.
„На тие што немаа маски им доделивме. Фала им на хуманитарните организации кои ни помогнаа со заштитина опрема“, истакна имамот од Шарената Џамија во Тетово.
Верниците велат дека ќе го прослават празникот различно од сите други години.
„Па годинава нема да биде како порано. Сме оделе на гости, сега може утринава само кај најблиската фамилија, со кои и практично сме секој ден и потоа секој дома. Од 11 часот кога ќе започне полицискиот час сите на семеен ручек“, велат верниците.
Верниците воглавно ги почитуваа здравствените препораки на властите, но поради нивната голема бројка за време на молитвата, во џамиите беше невоможно да се одржува препорачаната физичка дистанца.