Десетмина се полесно повредени во две експлозии во областа погодена од катастрофалните поплави во Хјустон, по ураганот Харви.
Експлозиите се случиле во хемиската фабрика Аркема во Крозби, во близина на Хјусот, за што и претходно имаше предупредувања, бидејќи поради поплавите нема струја и не работат апаратите за ладење на контејнерите во кои се чуваат хемикалии.
Информацијата за повредените ја потврдија и од Канцеларијата на шерифот на Хјустон.
Центарот за вонредни ситуации на округот Харис објави дека во Аркема се слушнале две експлозии.
Вработените се евакуирани, како и жителите на околу два километри од фабриката.
Службата за еколошка заштита соопшти дека во пречник од 4,8 километри околу фабриката има околу 1.300 домови со 3.800 луѓе.
Компаниите Ексон и Шел кои имаат рафинерии во оваа област соопштија дека како последица на поплавите од постројките се ослободени извесни количини хемикалии.
Жителите изминативе денови се пожалија на непријатна миризба низ Хјустон, а активистите за заштита на животната средина велат дека локалните жители се жалат на главоболки, грло и печење на очите.
Тропската бура Харви проследена со изобилни дождови предивика големи поплави во Тексас, каде загинаа 22 лица. Бурата сега пристигна во сојузната држава Лујзијана.