ВМРО ДПМНЕ вечерва ќе ја соопшти конечна одлука за референдумот. Во партискиот штаб на средби со партискиот врв се пратениците, по што седница ќе одржат Извршниот и Централниот комитет на партијата.
Партиски извори брифираат дека Мицкоски избира меѓу две опции – дали да го повика своето членство по сопствено убедување да гласа на референдумот „за„ или „против“ Договорот, или да го повика членството самото да одлучи дали воопшто ќе гласа или не на референдумот.
Втората опција која гласно ја застапувале поранешни функционери од времето на Груевски ќе значи затскриен повик за бојкот, коментираат партиски извори. „Ако изминатиов период водите кампања против Договорот со Грција, ваков повик од партискиот врв ќе значи исто што и повик за бојкот“, велат нашите извори.
Поддржувачите на повикот за прикриен бојкот, и покрај сугестиите на лидерите на сестринските партии на ВМРО ДМПНЕ, Меркел и Курц, го убедувале Мицкоски дека со ваква позиција тој би ја зацврстил лидерската позиција во партијата, а ќе го ископлицира и референдумот околу цензусот.
Во ваква ситуација ВМРО ДПМНЕ би добила простор да стане фактор кога процесот ќе се врати во Парламентот.
Другата струја која ја предводат реформаторите, но има поддршка и кај членови на Извршниот комитет аргументира дека партијата која од секогаш се залагала за референдум за името, не може да повикува на бојкот, туку треба јасно да порача дека членството треба да гласа, но по свој избор. Со ваков повик, ВМРО ДПМНЕ јасно ќе се дистанцира од повиците за бојкот, ќе води кампања за недостатоците во Договорот, а ќе остане доследна на евроатлантската интеграција за која се залага.
Официјално во партијата велат дека е рано да се процени која опција преовладува, затоа што се уште траеле консултациите.
Партискиот став, Мицкоски го навести на митингот во Кичево на 2 септември, кога кажа:
-Јас сум слуга на мојот народ, кој сум јас да му кажувам на народот што да прави, рече Мицкоски, со што јавно порача дека од партијата не треба да се очекува дециден став за референдумот, туку дека ќе остават одлуката да ја донесе членството.
Доколку преовлада ставот и ВМРО ДПМНЕ донесе одлука да ги повика гласачите сами да одлучат дали воопшто ќе излезат на гласање или не, разногласието во партијата ќе се пренесе и на денот на референдумот, со оглед на тоа што дел од членството веќе јавно се изјасни дека ќе излезе и ќе гласа на 30 септември, а други како Антонио Милошоски се изјаснија за бојкот.
Ова е прва клучна одлука која треба да ја донесе новиот претседател на партијата Мицкоски кој го презеде раководењето на ВМРО ДПМНЕ пред 9 месеци. Многумина сметаат дека токму вечерашната одлука ќе го профилира идното дејствување на Мицкоски, кој, од една страна треба да најде начин да ги обедини двете струи, но и да донесе одлука која нема да биде спротивна на интересите на државата во овој стратешки момент.
Од партијата најавуваат дека одлуката ќе ја соопшти Мицкоски доцна вечерва или утре изутрина.