„Еден живот, една љубов“ е насловот на документарниот филм во продукција на „Пи-Џи-Ем Нетворк“ од Белград што беше промовиран денеска во просториите на Македонскиот олимписки комитет (МОК) во Скопје. Филмското остварување ќе биде сервирано пред јавноста во три епизоди е идеја на новинарот Живко Здравкоски и во него се опфатени седумте децении од формирањето на „црвено-црните“. Првата серија го опфаќа периодот од 1947 година до 1963 година, втората се однесува на времето од 1963 година до 1987 година и третата од 1987 година до 2017 година.
Улогата на наратор во документарецот ја има Дарко Панчев, а за историјата на клубот говорат и 30 истакнати членови на најтрофејниот македонски фудбалски колектив од минатото, спортски коментатори и новинари. На промоцијата на филмот беа присутни бројни клупски легенди, но и претседателот на МОК, Васил Тупурковски, Ванчо Балевски, екс селекторите Ѓоко Хаџиевски и Ѓоре Јовановски, потоа Вујадин Станојковиќ, Драган Томовски, Драган Мутибариќ. Но, она што падна во очи беше отсуството на претставник од актуелното раководство на Вардар.
„Со задоволство ја одработивме оваа приказна. Беше уживање. Со оглед дека сме продукција од Белград не сакавме ние да ја раскажуваме вашата приказна, па затоа се решивме тоа да го направат легендите на клубот“, истакна Катерина Синѓелиќ кој заедно со првиот човек на „Пи-Џи-Ем Нетворк“ се јавуваат како потписници на вардаровиот документарец.
Премиерата на „Еден живот, една љубов“ е најавена околу Нова година на фреквенцијата на ТВ „Арена спорт“. Меѓутоа од белградската продукција истакнаа дека се водат преговори за филмот да оди и на некоја од македонските телевизии.