Циклусот еден месец „Шарена револуција“ денеска беше одбележан во знак на поддршка кон индивидуалните бизнисмени кои се под притисок од власта поради нивниот отпор на политиките. Впрочем затоа и беше обоена во разни бои зградата на Пазарната инспекција.
Како и вообичаено, протестот започна пред седиштето на СЈО во знак на поддршка за работата на оваа институција која треба да ги расчисти индициите за криминал кои произлегоа од прислушуваните телефонски разговори а кои ги објавуваше лидерот на опозицијата, Зоран Заев.
Маршот се одвиваше преку улицата каде што е трговскиот центар Рамстор и обоената зграда на Агенцијата за аудио и аудиовизуелни медиумски услуги, пропратен со ревулуционерна музика и свирежи.
Потоа преку 11 Октомври демонстрантите се упатија кон зградата каде што живее екс-премиерот Никола Груевски а во меѓувреме гласно се скандираше „Шутка не ти бега Никола“ како порака против лидерот на ВМРО-ДПМНЕ.
Симболично беше промовиран и портрет на Груевски кој “командосите“ на „Шарената револуција“ го обоија во разни бои. Приодот до зградата на Груевски беше блокиран.
Говорници на денешниот собир беа Ана Глигорова од Левица и Сања Лукаревска од СДСМ, кои порачаа дека политиките на власта се штетни и заплашувањата и инспекциите кон локалите мора да запрат.
Барањата на шарените револуционери:
– Итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО);
– Итна и неотповиклива оставка на Ѓорге Иванов од функцијата Претседател на Република Македонија;
– Произнесување на Уставниот суд за уставноста на СЈО;
– Формирање на специјално одделение на Кривичниот суд, кое ќе биде надлежно за случаите под јурисдикција на СЈО;
– Итно повлекување на одлуката за одржување на парламентарни избори на 5 јуни;
– Задолжително вклучување и присуство на независни претставници на граѓанското општество во процесот на решавање на кризата;
– Процесот на решавање на кризата да се одвива на територијата на Република Македонија;
– Формирање на преодна влада која докрај ќе ги имплементира итните реформски приоритети од извештајот на Прибе.
До исполнување на барањата, нашата политичка борба останува на улиците! Нема правда, нема мир!
#Протестирам #Protestoj ”