Москва: Во експлозија во фабрика во рускиот регион Рјазан загинаа 11 лица, а повредени се 130, објави руското Министерство за вонредни ситуации.
Министерството во соопштение на Телеграм изјави дека спасувачите сè уште ги пребаруваат урнатините на местото на несреќата, што се наоѓа на околу 320 километри југоисточно од Москва.
На местото на несреќата, како што велат од министерството, биле распоредени повеќе од 360 спасувачи и 90 единици опрема, а покрај пожарникарски и спасувачки екипи, на терен се и екипи на психолози од Министерството.
Гувернерот на регионот Рјазан, Павел Малков, изјави дека несреќата е предизвикана од пожар што избувнал во работилница во фабриката.
Светските медиуми пренесуваат дека причината за пожарот не е прецизирана и не е познато точно што се произведувало во таа фабрика.
Украинските дронови претходно ја таргетирале воената и економската инфраструктура во регионот Рјазан каде во јануари годинава со дронови се погодени голема рафинерија за нафта и електрана.