Мајкл Флин, поранешниот советник за национална безбедност на американскиот претседател Доналд Трамп, кој само по 24 дена на функцијата мораше да поднесе оставка поради тоа што лажел за своите контакти со рускиот амбасадор во САД, вчера преку својот адвокат му понуди на ФБИ и на конгресните тела која ја спроведуваат истрагата, сведочење во замена за имунитет од кривично гонење.

За овој ненадеен пресврт, за кој Си Ен Ен предвидува дека би можел да има „термонуклеарен„ политички ефект, прв извести Вол стрит Џурнал, но засега нема информации какви се‘ конкретни сознанија Флин е подготвен да сподели со истражителите, поради кои очигледно стравува дека би можел да се најде во правни проблеми.

Неговиот адвокат подоцна за Си Ен Ен во основа ја потврдил информацијата на весникот. Притоа рекол дека Флин сосема сигурно има што да каже, но додаде дека тој само сака гаранција дека во исполитизираната атмосфера на лов на вештерки ќе добие можност да сведочи без страв од нечесно кривично гонење, пишува хрватскиот Јутарњи лист.

Флин беше советник во изборниот тим на Трамп, а подоцна и еден од неговите најблиски соработници во Белата куќа и од таа позиција бил упатен во најчувствителните разговори и одлуки во сферата на надворешната политика, а директно учествувал и во разговорите за можно укинување на американските санкции кон Русија, што ги воведе администрацијата на Обама.

Неименувани официјални претставници на ФБИ, на Претставничкиот дом и на американскиот Сенат за Вол стрит Џурнал велат дека никој не е подготвен да ја прифати понудата на Флин.

-Не е јасно дали господинот Флин понудил да сведочи за некои конкретни аспекти на својата работа на местото советник за национална безбедност, но фактот дека побарал имунитет од кривично гонење сугерира дека тој смета, дека по кусиот престој на функцијата во Белата куќа, би можел  да се најде во правен проблен, изјавил неименуван функционер.

Флин беше принуден на оставка откако призна дека го излажал потпретседателот Мајк Пенс со тоа што му премолчел дека за време на транзицијата на власта, пред инаугурацијата на Трамп, бил во контакт со рускиот амбасадор во САД. Неговите телефонски контакти со амбасадорот Сергеј Кисљак ги „фати“ ФБИ прислушувајќи го рускиот дипломат и тоа на денот кога администрацијата на Обама  воведе санкции кон Москва.

ФБИ неодамна потврди дека спроведува истрага за можна поврзаност на тимот на Трамп со Русија и за наводна руска вмешаност во американскиот изборен процес, а демократите побараа оставка од Трамп. Службена Москва негира дека се мешала во изборите.

За Флин веќе од порано е познато дека пред да стане советник во тимот на Трамп бил во Русија каде три тамошни компании, вклучувајќи ја и државната телевизија РТ, му платиле повеќе десетици илјади долари за да држи говори.

Правниот аналитичар на Си Ен Ен, Пол Калан, во еден од првите коментари на најновите информации, изјави дека имунитетот најчесто се бара во случај кога сведокот има нешто многу конкретно да им понуди на истражителите, а тоа најчесто се информации за некое трето лице.