Новите австриски министри за надворешни работи, за внатрешни работи и за одбрана доаѓаат од редовите на екстремната десница, изјави денес лидерот на екстремно десната Партија на слбодата (ФПО) Хајнс-Кристијан Страхе.
Тој самиот ќе биде потпреседател на владата и задолжен за јавната администрација и спортот.
Ова беше најавено на денешната прес конференција на која беше претставена новата австриска влада на која зборуваат Страхе и новиот премиер Себастиан Курц.
Договорот за новата влада помеѓу екстремната десница и десницата исклучува референдум за излегување на Австрија од ЕУ, изјави Страхе.
Во Брисел владее загриженост поради можното анти-европско расположение на екстремната десница. Според европски дипломат во Брисел ова може да го доведе во опасност и проширувањето на ЕУ кон некои земји од Западниот Балкан.
Австриската екстремна десница во принцип не е против проширувањето но не би сакала во ЕУ да влезат муслимански земји. Ова пред се однесува на Турција но во опасност може да биде доведен и напредокот на многу балкански земји во кои има муслиманско население, предупредува дипломатот. Особено што од јуни во декември 2018 година Австрија седнува на претседателското столче во ЕУ па така земјата ќе има значајна улога во сите одлуки за проширувањето што се очекуваат во втората половина на следната година.
Лидерот на ОВП Курц, кој убедливо победи на неодамнешните избори, ќе биде именуван за канцелар и со 31 година ќе биде најмлад премиер во Европа.
Владата ќе ја скрати социјалната помош за мигрантите и ќе воведе одделни училишни одделенија за децата на мигранти кои не зборуваат германски. Прашањето на миграцијата беше една од главните теми на изборите на кои победата на Курц му овозможи да ја раскине долготрајната широка коалиција со социјал-демократите.
Главни задачи на коалицијата ќе бидат да се намалат даноците и бирократските пречки за бизнисот, да се засили директната демократија и дополнително да се намали приливот на мигранти, соопшти германската новинска агенција ДПА.