Термоелектраната Осломеј ќе се исклучи и на нејзино место ќе го вклучи Блок 2 во РЕК Битола, информираат од АД ЕЛЕМ.
„И покрај тоа што дефектот на системот за водено отпепелување е отстранет и ТЕ Осломеј може да работи по сите еколошки стандарди, раководството на АД ЕЛЕМ одлучи да го запре производството на електрична енергија во електраната, имајќи ја предвид загриженоста и сензитивноста на населението од околните места“ информираат од компанијата.
Блок 2 во РЕК Битола е веќе во мрежа, по превентивниот зафат во текот на викендот, и може непречено да се вклучи во производниот процес.
Откако РЕК „Осломеј“ почна со работа, жителите на најблиското село Журбино се заканија со протести поради чадот и смогот што излегуваа од комбинатот. Тие бараа да биде поставен филтер на оџакот на РЕК “Осломеј”.
Реагираа од ВМРО ДПМНЕ. Според партијата „неспособноста на раководните структури на АД ЕЛЕМ ги чини граѓаните милиони. АД ЕЛЕМ произведува струја во РЕК Осломеј по цена од 140 евра по мегават час, додека истата ја продава за 40 евра за мегават час. РЕК Осломеј произведува околу 2.400 мегават часа на ден, тоа значи дека истата количина на струја ја произведува по цена од приближно 336.000 евра, а ја продава за 96.000 евра. Вкупната загуба на дневно ниво со работата на РЕК Осломеј изнесува околу 240.000 евра“ пишува во соопштението од ВМРО ДПМНЕ.
Од партијата исто така додаваат дека десет дневното работење на РЕК Осломеј ја чинело државата приближно 2 милиони и 400 илјади евра и прашуваат која била логиката државата да влегува во загуба?