Банките доверители во „Фени Индустри“ преку соопштение информираа дека добиле писмо од бугарската компанија „Енекод“ во кој известуваат дека нема да бидат во можност да ги исплатуваат платите на вработените.
– Банките доверители ја информираат јавноста и вработените во Фени дека утрово добија маил од Рајчо Катсаров од Енекод, со кој покрај писмено доставување на понудата за превземање на Фени, известуваат дека во врска со поставениот предуслов од страна на банките доверители, нема да бидат во можност да ги исплатат платите на вработените во Фени, се вели во соопштението од банките – доверители.
Банките доверители претходно соопштија дека нивен релевантен соговорник може да биде само онаа компанија која ќе ги исплати двете заостанати плати за вработените и дел од доспеаните обврски кон банките.
Трите банки доверители вчера побараа да се докаже сериозноста на понудувачите со тоа што сопствениците најитно, најдоцна до почетокот на денешното рочиште закажано за 12 часот, да ја исплатат заостанатата плата на вработените од сопствени средства.
Банките информираа дека имаат добиено понуда од заинтересиран инвеститор, кој е подготвен веднаш по отворањето на стечајната постапка да депонира 3 милиони евра во банка во Македонија, со цел подмирување на неодложните обврски/трошоци во постапката, вклучувајќи ги и платите на вработените и другите обврски.