Црногорските кошаркарски репрезентативци се првите на Европското првенство кои на своја кожа ја почувствува моќта на Шпанија. Бранителот на континенталниот трон го оправда епитетот „фурија“ и во голем стил ги почна настапите во групата Ц во Клуж. Избраниците на Серџо Скариоло славеа со убедливи 99:60 (по четвртини – 26:14, 25:15, 19:15, 29:16) за најава на шампионските амбиции и на тековниот турнир.
Шпанците не дозволија ниту трошка надеж за Црна Гора дека може да избегне пораз. На мечот му пристапија максимано сериозно иако беше прв за нив на шампионатот и без разлика што против себе имаа ривал кој не е во првиот европски ешалон. Три од четирите периода ги решија во своја корист со двоцифрена разлика, а резултатски најизрамнети беа десетте минути по големиот одмор.
Најефикасен шпански играч беше Вили Ернангомез кој го заврши натпреварот со 18 поени што ги збогати со девет скока, неговиот брат Хуанчо додаде 13, Пау Гасол уфрли 10. Најдобар поединец во црногорската селекција беше Никола Вучевиќ со 16 коша, Никола Павличевиќ беше стрелец на 13 поени.
Важна победа на Србија за самодоверба по бројните откажувања
Успешен вовед на првенството и за кошаркарите на Србија. Северниот сосед, во рамки на групата Д во Истанбул, ја совлада шутерски расположената селекција на Летонија со 92:82. Конечниот исход беше доволна причина за задоволство кај селекторот Александар Ѓорѓевиќ и одбрано друштво. Првенствено поради бројните откажувања со кои Србите се соочија за време на подготовките, а потоа и поради враќањето во мечот и покрај двоцифрената предност што ја имаа Летонците во еден момент.
Како лидер на српскиот национален тим се промовира Богдан Богдановиќ кој постигна 30 поени, со дабл-дабл ефект заврши Милан Мачван (14 коша, 10 скока), Бобан Марјановиќ учествуваше со 13 коша во триумфот на популарните „орли“. Најистакнати кај составот од Балтикот беа Даирис Бертанс со 23 поени, Кристапс Порзингис запиша 18, а Давис Бертанс 16.
ЕП 2017 во кошарка – Финска, Израел, Романија, Турција
Група Ц (Клуж), 1 коло
Унгарија – Хрватска 58:67
Шпанија – Црна Гора 99:60
Романија – Чешка 68:83
Група Д (Истанбул), 1 коло
Белгија – В. Британија 103:90
Србија – Летонија 92:82
Турција – Русија 73:76