Претседателот на Турција, Реџеп Таип Ердоган денеска побара од светските сили да го признаат Ерусалим за главен град на Палестина и порача дека САД треба да ја поништат одлуката за признавање на градот како престолнина на Израел.
Обраќајќи се пред насобраните на самитот на муслимански лидери во Истанбул, Ердоган минатонеделната одлука на Вашингтон за признавање на Ерусалим за главен град на Израел ја нарече награда за израелските терористички дела, како и дека тој град претставува црвена линија за муслиманите.
Изјавата на Ердоган доаѓа откако САД неодамна стана првата држава која го призна Ерусалим за главен град на Израел, а прави и планови да ја префрли својата амбасада од Тел Авив во Ерусалим.
Вчера изралескиот премиер Бенјамин Нетанјаху, при посетата во Брисел изрази очекување дека европските држави ќе го следат примерот на САД и дека и тие ќе го прифатат Ерусалим како престолнина на неговата држава.
Зошто Ерусалим е црвената линија помеѓу Израел и Палестина?
Овој проблем е важен за конфликтот помеѓу Израел и Палестина. Градот е религиозен центар за јудаизмот, исламот и христијанството.
Израел го презеде целиот Ерусалим од Јордан во 1967 година во војната на Блискиот Исток и го смета за свој главен град.
Според мировниот договор од 1993 година помеѓу Израел и Палестина, статусот на градот треба да биде предмет на договор на крајот од целосното решавање на проблемот меѓу двете територии. Затоа Ерусалим никогаш не бил признат од друга земја, и сите држави своите амбасади ги имаат основано во Тел Авив.