Турскиот претседател Реџеп Тајип Ердоган остро ја критикуваше одлуката на САД за двојно зголемување на тарифите за турски увоз на челик и алуминиум, нарекувајќи го овој потег како “операција” и “економска војна” против Турција.
„САД спроведува операција против Турција … Целта е да се принуди Турција да се предаде на секое поле од финансии до политика, со цел Турција и турската нација да клекнат”, рече Ердоган во говорот пред членовите на владејачката Партија на правдата и развојот (АКП ) на состанокот во провинцијата Трабзон.
“Ние ја видовме вашата игра“, додаде тој, осврнувајќи се на флуктуацијата на турската лира во однос на доларот.
На 10 август, лирата, која веќе изгуби повеќе од една четвртина од својата вредност во однос на странските валути во 2018 година, падна на нов минимум од 6,6 за долар по одлуката на американскиот претседател Доналд Трамп да ги удвои тарифите за увоз на алуминиум и челик од Турција.
Турското Министерство за трговија го нарече потегот “нелегален”, повикувајќи се на правилата на Светската трговска организација.
“Тие се обидуваат да го постигнат она што не успеаја да го направат преку провокации и обид за државен удар “, рече тој.
Односите меѓу Турција и САД беа напнати поради голем број прашања, од сирискиот конфликт до затворањето на американскиот пастор Ендру Брунсон.
Ердоган го отфрли барањето за враќање на Брунсон во САД, потсетувајќи на обвинението за тероризам против него.
Тој ги предупреди САД дека го “менуваат стратегискиот партнер на НАТО со пастир”.
“Погрешно е да се казни Турција за свештеник . Уште еднаш се обраќам во САД: Срамно е. Вие менувате стратешки партнер на НАТО за пастор“ рече тој.