Со пласман на подиум по втората трка и четврто место по првата, Игор Стефановски-Иџе ги комплетира настапите на легендарната португалска улична трка во Вила Реал, четврта од вкупно шесте во годинашната сезона во ЕТЦЦ шампионатот.
Најдобриот македонски автомобилист го освои третото место во второто појавување на патеката попладнево. Но, ќе впише преполовен број на бодови на контото од причина што трката беше предвреме завршена. Безбедносното возило мораше да интервенира уште во воведниот круг по инцидентот на Норберт Наѓ, а потоа и за водечкиот во генералниот пласман, Швајцарецот Кристјоханес Шрајбер по што натпреварот не продолжи.
Победата ја однесе Унгарецот Жолт Давид Сабо, водечки во момент на прекинот, пред Бугаринот Пламен Кралев и Игор Стефановски.
Стефановски остана без подиум по првата трка поради судирот со Хозе Родригез во финишот. Македонскиот натпреварувач ја загуби контролата врз своето возило, Португалецот ја искористи ситуацијата што ја предизвика и како трет мина низ целта. Најавена е, сепак, истрага за инцидентот и не е исклучена можноста да следува казна за Родригез и враќање на Стефановски на третото место по административен пат.
Прв во воведната трка беше Чехот Петер Фулин пред Унгарецот Норберт Наѓ.
Следува двомесечна пауза во ЕТЦЦ шампионатот пред двата последни викенда во сезоната. Првиот нареден, според календарот, е од 15 до 17 септември во Золдер, Белгија.