Европската Комисија (ЕК) утрово најави активирање на механизмот за цивилна заштита за да ѝсе помогне на Белгија во справување со последиците од поплавите кои досега однесоа најмалку два човечки живота, јави дописничката на МИА од Брисел.
Цивилниот механизам за заштита на ЕУ им овозможува на земјите членки и земјите учеснички во него, да побараат итна помош и координација во случај на хуманитарна или природна катастрофа. Белгија од вчера се соочува со масовни поплави на југот и истокот од земјата. Две лица се починати, а се трага по десетици исчезнати.
Утрово е забележано и уривање на неколку куќи поради дождовите, а реките почнаа да излегуваат од своите корита.
Белгиската министерка за внатрешни работи, Анелис Верлинден, потврди дека е активиран механизмот на ЕУ за достава на потребна опрема и персонал, како и мобилизација на европска екипа за дополнителна прва помош.
– Следните часови и денови можат исто да бидат под знакот на силно невреме, предупреди министерката и увери дека приоритет е да се заштитат жителите.