Европската унија преку Федерика Могерини и Јоханес Хан и Германија преку шефот на германската дипломатија Зигмар Габриел топло го поздравија потпишувањето на Договорот за добрососедство помеѓу Бугарија и Македонија.

“Овој договор ја покажува определбата на двете страни да ги надминат билатералните проблеми и тој е иснпирација за целиот регион. Ова е позитивен чекор кон добрососедство и поттик за ЕУ перспективата на поранешната југословенска Република Македонија и е во интерес на нејзините граѓани”, велат шефицата на ЕУ дипломатијата Могерини и комесарот Хан.

За Германија ова е “историски договор за добрососедство”:

“Го поздравувам многу тоа што по многу години безуспешни преговори се најде консензуално решение на отворените прашања.

Со тоа двете држави испраќаат важен сигнал за успешна билатерална, но и регионална соработка на Балканот и за натамошната евро-атлантска интеграција на пјР Македонија.

Вреди да се напомене дека ова потпишување успеа да се спроведе за помалку од два месеци од инаугурацијата на новата македонска Влада”, пишува Габриел.

Тој се надева дека ваков чекор за конструктивна соработка ќе може да се најде и со другите соседи:

“Убеден сум дека новата Влада во Скопје ќе продолжи да го спроведува овој вид на конструктивна соработка консеквентно со сите соседи. Исто така ги поздравувам напорите на новата Влада, по долгогодишна стагнација сега конечно да започне со итно потребните реформи за приближување кон ЕУ”, вели Габриел.